Publiko gipasidan-an

CEBU, Philippines - Kinahanglang mag-binantayon ang publiko sa mga kalihukan ni kanhi presidente Gloria Arroyo kalabot sa plano niini nga magpatambal sa iyang sakit sa laing nasud.

Kini maoy gibutyag ni Mikay Dumaboc tigpamaba sa Akbayan dinhi sa Sugbo kinsa mipadayag nga kinahanglang atubangon ni Arroyo ang mga kaso  nga gipasaka batok kaniya kalabot sa mga anomaliya niya sa siya pay presidente sa nasud.

Matud pa ni Dumaboc nga nakapahibulong kaniya kun nganong moadto pa sa laing nasud si Arroyo nga aduna ma’y mga eksperto dinhi sa Pilipinas nga motambal sa sakit sa bukog.

Kahinumdoman nga gibasura sa Department of Justice ang hangyo sa kampo ni Arroyo nga tugotang magpatambal sa sakit sa bukog ngadto sa gawas ang kanhi pamuno nasud.

Ang mga nasud nga suroyan niini aron magpakonsulta sa iyang sakit naglakip   sa Singapore, Germany ug Spain apan sa nangagi, gihangyo niini nga moadto siya sa United States, Austria, Germany, ug Switzerland aron adto magpatambal.

Tungod kay gikuwestiyon ni Justice Secretary Leila Delima ang kadaghang destinasyon ni Arroyo napugngan ang maong plano sa kanhi Presidente sa nasud.

Si Arroyo kinsa dunay sakit sa bukog giliyokan og brace ang iyang lawas nga may gibug-atong mokabat sa tulo ka kilo.

Una na nga gipadayag sa kampo ni Arroyo nga adunay 25 ka nagkalainlaing klase sa tambal ang gitomar niya matag adlaw ug maglingkod na lang kini kung matulog.

Gani mikupos karon ang timbang sa kanhi presidente, nga anaa nalang sa 46 ka kilo gikan sa 55 kilos kaniadto    sa wala pa siya operahi. (BANAT NEWS)