Usa ang patay sa 3 nga gipamusil

CEBU, Philippines - Usa ang namatay    sa tulo ka tawong gipamusil sa managlahing lugar ning dakbayan sa Sugbo sa miaging gabii.

Ang nakalas giila sa kapolisan nga si Nicacio Villarmia, 16, ulitawo, ug ang mga samaron mao si Ronnel Arguedo, 22, nga ig-agaw ni Villarmia nga pulos taga barangay Ermita, ug si Francis Abella, 32, nga taga dalan V. Rama sa barangay Sambag 2, pulos ning dakbayan sa Sugbo.

Ang suspetsadong mipusil kang Villarmia ug Arguedo nailhan usab nga si Galie Secretaria, hingkod, silingan ra sa mga biktima samtang wala hiilhi ang miluthang kang Abella.

Sumala sa kapolisan nga sila si Villarmia ug Arguedo naglingkod-lingkod sa daplin sa karsada sa S. Escario street sa Ermita dihang naagian sila sa suspetsado nga nagsakay og motorsiklo.

Apan wala sila makabantay dihang milanit kini sa iyang armas de fuego   ug mipaulan kanila og mga bala hinungdan nga naintimano sa pagkamatay si Villarmia, samtang naangol si Arguedo.

Si Villarmia gideklarar nga patay na sa paghiabot didto sa Cebu City Medical Center diin tua usab karon tambali si Arguedo.

Samtang si Abella nakig-inom sa iyang mga barkada didto sa usa ka tindahan sa ilang lugar dihang kalit nga miabot ang usa ka motorsiklo nga gisakyan og duha ka tawo nga wala hiilhi.

Kumo kay nagtalikod siya nga naglingkod maayo kaayong pagkaigo sa bala sa iyang buko-buko gikan sa backrider sa motorsiklo.

Human siya mahagba misirit dayon pahilayo samaong   lugar ang mga kriminal.

Tua siya karon patambali sa Visayas Community Hospital samtang padayon pang gipangita sa kapolisan ang mga nakasibat nga mga mipusil sa mga biktima. (WC)(BANAT NEWS)