CEBU, Philippines - Napulo ug duha ka tawo ang naluwas human matikyaob sa dagat ang pump boat nga ilang gisakyan didto sa tunga-tungang bahin sa kadagatan sa barangay Caohagan sa isla sa Olango sa dakbayan sa Lapulapu ug Green Island sa lalawigan sa Bohol sa miaging kaadlawon.
Tulo sa 12 ka pasahero sa maong pump boat nakalangoy hangtod sa daplin sa baybayon sa Lapulapu, samtang ang siyam nabangalan ug naluwas sa nahiagi nga mga mananagat sa maong dapit ug gihatod ngadto sa Olango.
Ang tulo nga nanglangoy paingon sa baybayon mao si Jennefer Enanoy, Junrey Eramil ug Moises Abayan, pulos hingkod nga pulos taga isla sa Olango.
Didto sila modagsa sa Plantation Bay Resort sa Lapulapu.
Samtang ang mga ngalan sa siyam nga nasalbar sa mga mananagat wala kakuhai og ngalan sa mga otoridad.
Si Cebu Coast Guard District Commander Rolando Punzalan miingon nga ang motor banca gipanag-iya sa pamilyang Abayan sa dakbayan sa Lapulapu.
Matud pa ni Punzalan nga samtang naglawig ang maong sakyanan sa kadagatan paingon sa Bohol kalit lamang mikusog ang hangin dayon midagko ang mga bawod sa dagat hinungdan sa pagtikyaob sa ilang gisakyan.
Si Punzalan miingon nga dihang nadawat sa iyang buhatan ang taho kalabot sa maong hitabo dali niyang gimando sa iyang mga sakop ang pagpahigayon og search and rescue operation sa siyam ka mga pasahero nga unang gikataho nga na-missing sa kadagatan.
Hinuon ang naluwas nga siyam ka tawo didto dad-a sa mga nakasalbar kanila sa Hilutungan Island sa lungsod sa Cordova.
Dugang pa ni Punzalan nga si barangay kagawad Adulfo Igot dali nga miadto sa Hilutungan ug gidala ang siyam sa ilang dapit sa barangay Caohagan sa isla sa Olango.
Giklaro ni Punzalan nga pulos taga Sugbo ang mga pasahero sa maong nalunod nga pump boat. (BANAT NEWS)