Marquez diskontento sa desisyon

CEBU, Philippines - Milampos si Filipino boxing icon Manny Pacquiao pagdepensa sa iyang WBO welterweight title pinaagi sa 12-round majority decision batok sa iyang mortal nga karibal nga si Juan Manuel Marquez kagahapon didto sa MGM Grand Garden Arena sa Las Vegas.

Apan lahi sa gilauman sa daghang Pinoy boxing fans, usa ka kontrobersiyal ug sikit nga away ang nahitabo tali ni Pacquiao ug Marquez kinsa una nang gitagna nga dili molungtad og 12 ka hugna.

Si Judge Robert Hoyle mihatag og 114-114 draw, samtang sila si Dave Moretti ug Glenn Trowbridge miiskor og 115-113 ug 116-112 pabor ni Pacquiao alang sa daog.

Kontrobersiyal kini nga katapusan sa epic trilogy ilabi na sa habig sa Pinoy boxing superstar kinsa pakyas paghimo og usa ka kombinsido nga kadaugan batok sa 38-anyos nga Mexican warrior.

Base sa CompuBox, si Pacquiao mipatugpa og 176 sa iyang 578 ka mga kinumo nga gilabay ngadto ni Marquez, samtang ang Mehikano igo lang nakaigo kang Pacquiao sa 138 ka higayon sa 436 niini ka suntok.

Mas daghan usab ang power punches nga gipasulod ni Pacquiao nga mikabat sa 117 ang tanan itandi sa 100 ka kumo ni Marquez.

"I clearly won the fight," matud pa ni Pacquiao atol sa post-fight interview. "I got hurt a couple of times, but I'm very careful."

Apan bisan pa niini, wala gihapon kapugngi sa pipila ka mga boxing fans ilabi na kadtong mga Mehikano nga mipakita sa ilang kasagmuyo tungod sa gituohan nila nga si Marquez maoy mananaog.

“The crowd was angry at the decision and several Marquez fans threw drinks toward the ring, splattering the ringside media section,” segun pa sa boxing analyst sa Yahoo! Sports nga si Kevin Iole.

Sa iyang bahin, si Marquez mipadayag usab sa iyang kadismaya ug nagtuo nga gikawat sa mga hurado gikan sa iyang mga kamot ang daog.

"It's hard when you are fighting against the fighter and the judges as well," matud pa ni Marquez.

Bukas hinuon sa posibilidad nga may rematch si Top Rank Inc. CEO Bob Arum kun magkasinabot ang matag kampo. "I am bound and determine to find a definitive winner once and for all. If both fighters agree, I'd like to do the rematch in 2012," matud pa niya. (WC)(BANAT NEWS)