Napaig sa iyang daob

CEBU, Philippines - Patay nang naugkat sa mga kabanay ang 81 anyos nga lolo human kini masugba sa daob sa iyang uma didto sa bukirang bahin sa barangay Mayana sa lungsod sa Barili niadtong Huwebes sa hapon.

Ang biktimang napaig mao si Jacinto Escultor, 81, minyo, mag-uuma ug nagpuyo sa maong lugar.

Si SPO1 Job Sarvida sa Barili Police Station mibutyag sa Banat News nga base sa pamahayag ni Barseliza Escultor, asawa sa biktima, nga ang nahauna sa sayo pa nananghid kaniya kay moadto sa iyang uma aron manghampas sa mga sagbot ug gunahon nianang alas 8:00 pa sa buntag sa maong adlaw. Apan sumala sa asawa nga nahibulong nalang siya nga sa pag-abot niya gikang nangumpra sa merkado wala pa man mahibalik ang biktima hinungdan nga iya kining giapas didto sa ilang uma.

Apan puwerting kurata niya dihang maoy misugat sa iyang mga mata ang wala nay kinabuhi ug napaig na niyang bana kay nasugba kini sa iyang gidaubang mga sagbot daplin sa uma. Ang mga kabanay na maoy miugkat sa patay’ng lawas niini ug wala na magpaabot sa mga polis ug gideretso nalang nila kini og hatod ngadto sa punerarya.

Gituohan sa mga kabanay nga samtang nanghampas sa mga gaay nang mga sanga sa kahoy ug mga sagbot sa uma, gidaoban kini sa biktima ug malagmit natumba kini ngadto sa daob ug gumikan sa kainit uban sa kaluya na sa tuhod kay tiguwang na wala na makabangon nga maoy nakaingon sa iyang kamatayon.

Gumikan kay may gilay-on gikan sa ilang balay ug wala usay tawo sa palibot, walay nakabantay sa maong hitabo ug walay nakatabang pagsalbar sa biktima. (BANATNEWS)