Mibaligya'g shabu sa asset tiklo

CEBU, Philippines - Usa ka drayber sa habal-habal kinsa giingong namaligya og shabu ngadto sa usa ka asset sa polis nasikop didto   sa barangay Bagasawe, lungsod sa Tuburan, sa miaging Biyernes sa gabii.

Nagtingkagol karon sa Tuburan detention cell si Roy Mayo Luyao, 31, kinsa nasakmitan og upat ka paketeng shabu nga nagkantidad tanan og P2,000.

Si PO1 Nelson Sadile kinsa kauban sa usa ka police asset maoy nakasikop kang Luyao.

Si PO1 Eric Diamante sa Tuburan Police Station mibutyag nga sila si Sadile uban sa usa ka police asset mipahigayon og surveillance operation sa mga drug personality sa barangay Putat mga alas 8:00 sa gabii sa nahisgutang adlaw.

Nianang pagka-alas 10:00 sa maong gabii mibiya sila sa Putat kay mibalik na sila ngadto sa police station  sa Tuburan.

Apan matud pa pag-abot nila sa Bagasawe, mihiyos ang ligid sa motorsikilo nilang gisakyan.

Si Sadile ug ang asset nagkasabot nga magbuwag sa pagpanlakaw aron mangita og vulcanizing shop.

Si Sadile naglakaw nga nagguyod sa motorsiklo hangtod ngadto sa usa ka vulcanizing shop.

Pila ka minuto ang nakalabay ang asset miabot sa vulcanizing sakay sa motorsiklo sa suspetsado.

Dali kining nanaog ug sekretong mipahibawo kang Sadile nga gibaligyaan siya og ginadiling drugas ni Luyao ang drayber sa motorsiklo nga iyang gisakyan.

Diha-diha gisikop dayon ni Sadile si Luyao ug nasakmit ang upat ka paketeng shabu gikan niini nga nagkantidad og tag P500 matag usa.

Si Luyao mikagulkol dayon sa prisohan ug andam na kining pasakaan og kaso sa kapolian karong Lunes. (BANATNEWS)