Shabu queen gipagawas sa karsel

CEBU, Philippines - Ang gibunyagang shabu queen ug ang iyang higala napawalay sala human mapakyas ang kapolisan nga misikop kaniya sa pagtuman sa tanang gipangayo sa korte kanila aron mapadayon ang kaso.

Si Regional Trial Court Judge Macaundas Hadjirasul sa Branch 8 mibasura sa tulo ka kasong kriminal nga gisang-at batok kang Chuebe Lim ug Edna Flores sa kasong giingong pagpamaligya niini og paghupot og ginadiling drugas.

Si Hadjirasul mimando usab sa Cebu City Jail Warden nga pabuhian ang nahisgutang mga akusado gikan sa karsel ug gikinahanglan usab kini nga mosumiter og compliance report sulod sa napulo ka adlaw.

Samtang ang shabu nga nakuha sa kapolisan gideklarar usab kini nga forfeited nga pabor na sa gobiyerno. Sa ruling ni Hadjirasul mituki kini og tulo ka rason nganung mabasura ang maong kaso.

Matud pa ni Hadjirasul nga ang prosecution napakyas sa pag-comply sa “objective test” nga detalyado atol sa buy-bust operation dihang napakyas sila papresentar sa confidential informant o kalabot sa mga illegal nga patigayon sa mga akusado.

Ikaduhang gibutyag ni Hadjirasul nga ang prosecution napakyas usab sa pagbaraw sa testimoniya sa akusado nga si Lim ug mihatag usab og pipila ka impression ngadto sa korte nga magpamatuod nga si PSUPT Pablo Labra wala masayod sa giingong aktibidad. Katapusang rason ni Hadjirasul mao nga ang arresting officer napakyas usab sa pag-comply sa mga requirement of inventory sa ilang nakuha nga illegal nga drugas uban sa representative gikan sa media, Department of Justice ug elected public official.

Si Lim ug Flores nasikop niadtong buwan sa Pebrero 3 tuig 2010 pasado alas 8 sa gabii atol sa gipahigayong buy-bust operation sa Highway Tagunol ning dakbayan.

Ang kapolisan gikatahong nakakuha og shabu nga mga pinutos gikan sa akusado nga mao ang 4.42 grams , 4.89 grams, 1.74 grams ug 0.18 grams. (BANAT NEWS)