Highway guard nangilkil

CEBU, Philippines - Usa ka tawong nagpaila nga sakop sa highway  patrol sa kapolisan giingong nangilkil og kuwarta gikan sa usa ka motorista niadtong Huwebes sa buntag didto sa Cebu South Coastal Road, habig sa barangay Cansojong, dakbayan sa Talisay.

Ang biktima mao ang magtiayong Nilo ug Alicia Sepada, pulos hingkod, ug mga residente sa barangay Media Onse, dakbayan sa Toledo.

Si SPO1 Nestor Canlobo, duty desk officer sa Talisay City Police Station sa pakighinabi sa Banat News kagahapon nagkanayon nga ang magtiayong Sepada nagbiyahe sa nahisgutang lugar sakay sa ilang multicab.

Usa ka wala hiilhing lalaki kinsa nagsakay og motorsiklo apan nagsibilyan mipara kanila ug giingong nagpailang highway guard. Ang hinungdan sa pagpara mao ang depektosong suga sa multicab sa tuong bahin ug gikuha sa giingong highway patrol ang lisensiya ni Nilo.

Ang maong magtiayon mipasangil nga ang nahisgutang lalaki nagkanayon nga ang maong kalapasann may multa nga P1,500 subay sa taripa sa LTO. Busa si Nilo giingong mihangyo sa maong lalaki nga P100 lang ang iyang ihatag aron dili sila sikopon ubos sa maong kalapasan.

Apan matud sa magtiayon nga ang maong mananakop misumbalik pagpangutana nga miingon, “unsay pagtuo nimo barangay tanod?

Unya   nangayo kuno kini og P150 sa magtiayon apan tungod kay wala may ikahatag ang mga biktima sa maong kantidad gisuwatan sa maong lalaki ang likod sa lisensiya ni Nilo og “defective lights” apan wala ibutang niini ang iyang ngalan isip arresting officer.

Busa mihangyo si Nilo nga dili lang pasuwatan ang likod sa iyang lisensya ug gani iyang giingnan ang mananakop nga magpa-isyu lang siya og resibo kun aduna man siyay kalapasan. Apan matud pa mihiwasa sa kasuko  ang maong tawo ug isog kaayong milanit sa iyang armas de fuego nga gitangkil   sa iyang hawak.

Sa kahadlok sa mga biktima,   mipasutoy kini og padagan sa ilang sakyanan paingon ngadto sa police station sa barangay Poblacion ug gi-report ang maong insidente.

Sa pagkakaron padayon pang gipanid-an sa kapolisan sa Talisay ang maong tawo, kinsa gituohan dili polis ug dili usab opisyal sa LTO. (BANAT NEWS)