Buhatan sa DSWD gilungkab

CEBU, Philippines - Gilungkab sa dili mominos tulo ka mga batang menor de edad ang buhatan sa Department of Social Welfare and Development sa barangay Poblacion sa dakbayan sa Danao niadtong Martes.

Nahanaw sa maong buhatan ang computer monitor ug P7,000 cash ug kini na maoy ikaduhang higayon nga may nahitabong pagpanglungkab sa maong dakbayan sulod sa nakalabay’ng duha ka semana.

Unang gilungkab mao ang opisina sa prinsipal sa Ramon M. Durano Science and Technology Educational Center sa barangay Guinsay niadtong Oktubre 28.

Ang buhatan sa DSWD anaa sulod sa building sa city hall apan ang manglungkabay diha moagi sa luyong bahin sa maong buhatan lusot sa bintana pinaagi sa pagbuak niini.

Si Nelson Sotto, usa ka gwardiya sa City Hall mitug-an nga iyahang gisusi ang palibot alas-6 sa buntag niadtong Martes ug nahibulong nalang siya nga gitaptapan nalang og plywood ang bintana sa buhatan sa DSWD.

Dihang iyang gilili nahanaw na ang  computer monitor maong mitawag siya sa kapolisan. Sa gihimong imbestigasyon nasuta nga nawagtang usab ang P7 mil cash sa usa sa mga drawers sa maong buhatan.

Matud ni Chief Insp. Ricky Delelis, hepe sa Danao City Police Station tulo ka menor de edad ang posibleng responsable sa pagpanglungkab base sa gidak-on sa giguba nga bintana.

Sa nasayran niadtong Oktubre 28, gibana-banang mokabat sa P300,000 ang kantidad sa mga nahanaw nga computer equipment ang gikuha usab sa wala mailhing manglungkabay sulod sa  The Ramon M. Durano Science and Technology Educational Center.

Si Sr. Supt. Patrocinio Comendador, director sa Cebu Provincial Police Office (CPPO) nagkanayon duna na silay gipanid-an nga mga nalambigit usab sa pagpanglungkab apan nagdumili siya pagtug-an sa mga pangan niini.

“It’s a public place man gud but I will recommend security assessment,” matud pa niya sama sa pagbutang og security cameras. (BANATNEWS)