Enforcer nga 'gihulga' ni Joavan suportahan

CEBU, Philippines - Ang chairman sa City of Talisay Traffic Operation Development Authority (CT-TODA) nga si Tronando Lastimosa nagkanayon nga mopaluyo sila sa enforcer nga giingong gihulga sa sinagop ni Mayor Socrates Fernandez nga si Joavan Fernandez.

Kahinumduman nga si Marlorence Monreal misumbong sa kapolisan human giingong gihulga ni Joavan nga rakrakan tungod sa pagsitar niini sa sinagop sa mayor kabahin sa kalapasan sa trapiko niadtong Lunes sa buntag diha sa barangay Tabunok.

Si Lastimosa nga nahinabi sa Banat News nagkanayon nga suportahan nila si Monreal kung mopasaka man kini og reklamo batok kang Joavan. Matud pa niya nga adunay mga saksing makatumbok kang Joavan nga gihulga gyud niini ang iyang sakop.

Sa laing bahin, si Superintendent Eddie Recamara, hepe sa Talisay City Police Station nagkanayon nga dili dayon angayang basulon si Joavan.

“Ang akoa lang not message to him (Joavan) but message to the public nga we will not judge him, because until now we are not able to get his statement, we were not in the area where the incident happened, so we did not know the circumstances of the incident.”

Matud usab sa hepe nga posibleng dunay rason usab ang sinagop sa mayor nganong nalambigit na usab kini og laing kasamok human sa unom ka buwan nga nahilom na kini.

Hinuon si Recamara mipasalig nga mopahigayon sila og patas nga imbestigasyon sa hitabo ug ipatuman gyud nila ang balaod.

Sa laing kasamok nga gikalambigitan ni Joavan niadtong Martes diin usa ka Regie Aranas nga mireklamong gihapsan niini og botelya sa usa ka kan-anan, giimbitar na kini sa kapolisan aron pag-isyu og pamahayag kabahin sa insidente. (BANATNEWS)