2 babaye misuborno sa polis gibalhog

CEBU, Philippines - Nag-atubang karun og kasong corruption of public official ang duha ka babaye human sila misuway sa pagsuborno sa duha ka polis bugti sa kagawasan sa nadakpang bana sa usa sa mga babaye tungod sa kaso sa illegal drugs.

Si Prosecutor Ernesto Narido, Jr. mipasaka og kaso batok nilang Mary Ann Torniado ug Christy Ramos uban sa bana niini nga si Isabelo Fernandez Jr.

Matud pa ni Narido nga iyang nakita nga aduna gyuy igong basihan nga masang-at ang maong kaso ngadto na sa korte human ang mga akusado nagdumili na sa pagpaubos og preliminary investigation diin unta kini patubagon sa mga alegasyon nga gisang-at batok kanila.

Tungod niini si Narido mirekomendar og P20 mil nga piyansa bugti sa temporaryong kagawasan sa nahisgutang akusado.

Sa giluwatang joint affidavit sa duha ka polis mibutyag kini nga nadestino sila sa Regional Anti-Illegal Drugs Special Operations Task Group (RAIDSOTG)-7 diin ilang nadakpan niadtong Nobiyembre 5 ning tuiga sa buy-bust operation sa M. dela Concepcion St., sa barangay Pasil si Fernandez.

Apan samtang nagpreparar sila sa mga dokumento pagpasaka sa kaso ni Fernandez si PO3 Roehl Patalinghug nakadawat og tawag sa nagpailang asawa ni Fernandez ug mihaylo kanilang bayran sila og P200 mil basta buhian lang ang bana niini.

Dihang iyang gipasidan-an ang maong babaye giingong gipatas-an niini ang tanyag ngadto sa P280 mil. Tungod niini ang hepe sa Operations and Intel Division chief Marvin Sanchez milusad dayon og entrapment operation batok sa maong babaye.

Ang akusado daling miadto sa buhatan sa RAIDSOTG-7 dala ang kantidad nga P280 mil ug gitunol kini ngadto kang Patalinghug apan nakugang ang babaye ug kauban nga gidakop sila sa mga polis.

Ang lalaking Fernandez gipasakaan usab og kalapasan sa Section 11 ug 5 sa Article II of Republic Act 9165 samtang laing kaso usab sa asawa niini ug sa kaubang babaye.

Si Narido walay girekomendar nga piyansa sa lalaking Fernandez tungod sa pagpamaligya og ilegal nga drugas. (BANATNEWS)