Nakuryentihan sa grinder patay

CEBU, Philippines - Patay nang nadangat sa tambalanan ang usa ka panday human kini makuryentihe samtang nagtrabaho sa Tabunok Elementary School sa barangay Tabunok sa lungsod sa Sogod niadtong Miyerkules sa alas 8:00 sa buntag.

Ang nakuryentihan patay mao si Edison Talingting, molupyo sa maong lugar kinsa wala na matabang pa sa tambalanan.

Matud ni PO2 Keth Nuñeza sa Sogod Police Station dihang nahinabi sa Banat News ang lineman sa Cebu Electric Cooperative (CEBECCO) nga si Neil Arche, 51, nagpuyo ra usab sa maong lugar maoy mitawag kanila ug nagpahibawo sa panghitabo. Nasuta sa imbestigasyon nga migamit kini og portable grinder nianang tungura apan sa iyang pagsaksak niini sa plug kalit siyang mikirig ug nahagba.

Gisuwayan pa unta kini og tabang samtang nagkirig kirig pa ug gidali paghatud sa Juan Dosado Memorial Hospital apan gideklarar kini sa mga doktor nga dead on arrival (DOA).

Ang kapolisan padayon pa sa ilang imbestigasyon pagsusi kung unsay nakaingon nga nakuryentihan kini sa maong electric grinder. (BANATNEWS)