Lalaki gi-salvage gisulod sa sako

CEBU, Philippines - Patay’ng lawas sa usa ka lalaki nga gituohang gi-salvage ug gisulod sa sako ang gilabay sa basurahan sa Sitio Saac 2 sa barangay Mactan dakbayan sa Lapulapu kagahapon sa buntag.

Ang biktima personal nga giila sa asawa niini nga mao si Rameni Cabargo, residente sa maong dapit.

Matud pa ni Ernesto Dungog, residente sa maong dapit nga usa ka babaye ang miduol kaniya mga alas 5:00 kagahapon sa kaadlawon ug mitaho nga dunay patay’ng tawo nga gisulod sa sako sa dumpsite sa maong dapit.

Gumikan niini mitawag usab si Dungog sa kapolisan ug sa paghiling sa mga imbestigador nasuta nga adunay mga samad sa ulo ang biktima agi sa usa ka mahait nga hinagiban.

Nagduda si PO2 Winston Ybañez ug mga kaubanan nga   wala mahitabo ang krimen sa maong dapit kundili igo lamang kining gilabay sa maong lugar.

Ang ulo ni Cabargo migimaw sa sako ug ang katunga sa lawas niini hubo na ug wala nay underwear o brief.

Matud pa ni Ybañez dili lang usa ka tawo ang mihimo sa maong krimen. Sa pagkakaron wala pa sila’y matumbok nga motibo ug si kinsa ang mamumuno sa biktima.

Pipila ka mga residente sa maong dapit nga nahinabi sa Banat News mipasangil sa biktima nga nalambigit kini sa pipila ka mga insidente sa pagpangawat sa maong dapit ug kini gisusi na sa kapolisan.

Ang maong krimen maoy ikaduhang hitabo sa kasong pagpatay ning semanaha diha sa maong barangay, butang nga gikabalaka ni Lapulapu City Mayor Paz Radaza ilabi na nga siya molupyo sa maong barangay.

Gimando karon ni Radaza sa kapolisan nga paspasan ang pagsulbad sa maong mga krimen ug sikupon ang mga nakalapas sa balaod.(EIM) (BANATNEWS)