Prangkisa sa traysikol sa Mandaue wa pay 2 mil

CEBU, Philippines - Gihatagan og kahigayonan ang mga tag-iya sa mga traysikol sa dakbayan sa Mandaue nga nag-operate og kolurom nga traysikol nga makabaton og legal nga prangkisa aron i-rehistro kutob Nobiyembre 22 niining tuiga ang ilang traysikol.

Ang executive direktor sa Traffic Enforcement Agency in Mandaue (TEAM) nga si Edwin Ermac dihang nahinabi sa Banat News miingon nga sa pagkakaron wala pa makompleto ang 2,000 ka prangkisa nga limit nga nakaparehistro kanila.

Mao kini hinungdan nga gilugwayan kutob sa Nobiyembre 22 ang verification sa mga prangkisa sa mga traysikol aron ang mga nanag-iya og mini nga prangkisa mahatagan og higayong mahimong legal ang ilang papeles.

Si Ermac miingon nga dili na lisod alang sa mga traffic enforcers ang pag-ila sa fake nga prangkisa niining panahona tungod kay kadtong naka -renew o nakapa-validate adunay ipapilit nga business plate sa ilang sidecars.

Sa pagkakaron aduna pa lay 1,600 ka mga prangkisa ang nahatag sa siyudad ug kung mapuno na ang 2 mil wala nay tugutang dugang prangkisa alang sa traysikol ug sikupon ang masakpang traysikol nga walay prangkisa.

Nasuta dihang naghigpit ang Mandaue sa mga traysikol nadiskubrehan hinuon nilang miabot na kini ngadto sa 5 mil ang nagdagan apan sa ilang talaan 2 mil ra gimandong prangkisa.

Nasakpan hinuon nga adunay sakop sa city hall sa Mandaue nga maoy namaligya sa mga pekeng prangkisa kinsa mi-resign na sa trabaho human masakpi.

Matud pa ni Ermac kadtong ma-impound dili makuha sa tag-iya hangtud nga dili sila makabayad sa multa ug molukat sila og prangkisa.

Kung dili kini lukaton sulod sa usa ka bulan isubasta kini aron mabaligya. (BANATNEWS)