Traysikol dakpon sa ilawom sa flyover

CEBU, Philippines - Panakpon na ang mga traysikol nga masakpang magpundo ilawom sa flyover sa barangay Tabunok dakbayan sa Talisay sumala pa sa vice chairman sa City of Talisay Traffic Operation Development Authority (CT-TODA) nga si Tronando Lastimosa.

Si Lastimosa nga nahinabi sa Banat News nagkanayon nga sa gipahigayong meeting niadtong Martes sa CT-TODA council nauyonan nga pabalhinon na gyud ngadto sa parkingan sa bag-ong merkado sa Lagtang ang mga traysikol.

Matud ni Lastimosa nga si Jun Cabrillos, representante sa Land Transportation Office (LTO) ang mipasar og resolusyon sa maong katuyoan base sa “national laws” kabahin sa legalidad sa mga moparada o mopundong mga sakyanan diha sa mga national highways.

Sa sunod semana ang siyudad gikatakdang mopahigayon na og operasyon batok sa mga traysikol nga magpundo ilawom sa flyover.

Si Lastimosa nagkanayon nga gikatakdang karong adlawa (Biyernes) mopadala na sila og suwat ngadto sa LTO alang sa ilang pormal nga request nga ang maong buhatan mopadala og tawo nga maoy moimplementar sa pagpanakop sa mga traysikol nga nagparada ilawom sa flyover.

Kahinumduman nga dihang gisiradohan ang merkado publiko diha sa Tabunok niadtong Agosto 28, 2011 ang mga traysikol giawhag nga adto na sa parking area sa bag-ong merkado sa barangay Lagtang mag-terminal.

Apan ang mga traysikol nagdumili pagsunod niini tungod kay giingong gamay kaayo ang manakay sa maong lugar ug apektado ang ilang kita. (EIM) (BANATNEWS)