Kapitan mibabag sa trak sa basura

CEBU, Philippines - Midangop sa kapulisan ang drayber sa garbage truck sa lungsod sa Barili ug mipasangil batok sa kapitan sa barangay Cangdangpas uban sa duha ka mga kagawad ug tanod nga gibabagan siya paglabay sa basura diha sa landfill sa barangay niadtong alas 9:00 sa Lunes sa buntag.

Si Teofanes Ungria, 44, nagpuyo sa barangay Maigang, kawani sa munisipyo sa lungsod ug garbage truck driver mipasangil nila ni barangay kapitan Leonardo Inigo Sr., ug duha niini ka mga kagawad nga wala niya mailhi ug mga tanod.

Matud ni SPO1 Job Sarveda sa Barili Police Station dihang nahinabi sa Banat News paingon nang mosulod sa landfill ang garbage truck dihang gibabagan sa kapitan sa multicab sa barangay ang agianan aron dili makasulod ang trak ni Ungria.

Ang kapitan nangatarungan nga wala niya tuguti nga malabayan pa og mga basura ang maong landfill sa ilang lugar tungod sa gipasar nilang resolusyon sa konseho sa barangay nga nagdili na pagpalabay og basura diha sa maong landfill.

Samtang si Barili Mayor Teresito Mariñas mipadayag sa Banat News sa telepono nga ilegal ang gihimo sa kapitan tungod kay ang lungsod maoy nag-operate sa maong landfill ug nag-abang kini sa tag-iya sa luna hangtud pa sa 2013 ang ilang kontrata.

Matud sa mayor pasakaan nila og kasong grave abuse of authority ingon man usurpation of authority ang kapitan sa buhatan sa Ombudsman Visayas.

Sumala pa sa mayor nagtipun-og karun sa mga basura ang ilang lungsod tungod sa gibuhat sa kapitan imbes regular nilang mahipos ang mga basura diha sa landfill gikan pa niadtong 2008.

Nagtuo ang mayor nga pamolitika kini ug gituyo sa iyang mga kontra aron sabotahion ang iyang administrasyon sama sa dili na pag-atiman og hipos sa mga basura matag adlaw aron siya maoy basulon sa mga molupyo.

Gisuwayan unta pagkuha og habig ning tigbalita si Inego apan pakyas ang maong tinguha. (EIM) (BANATNEWS)