Gwen misumbalik saway sa kritiko

CEBU, Philippines -  Misumbalik dasdas pagsaway si Governor Gwendolyn Garcia sa iyang mga kritiko ilabina sa mga manlilindog sa lokal nga pamantalaan dinhi sa Sugbo human migawas ang usa ka blind item nga nagtumbok nga ang provincial board maoy angayan nga modisider sa pagpalit og mga K9 dog alang sa PDEA-7.

Matud pa sa gobernador nga sayop ang maong lindog tungod kay ang modisisyon sa bisan unsang mga programa ug proyekto, katungdanan man sa usa ka local chief executive ug dili sa legislative branch nga mao ang hunta probinsiyal.

Subling gipasabot sa gobernador nga wala siyay nakitang sayop sa paghatag og dugang K9 dog sa PDEA sanglit dako man kini og matabang alang sa mas lapad ug epektibong operasyon sa maong ahensya   batok sa illegal nga drugas nga maoy usa sa gihingusgan nga kampanya sa probinsya sa Sugbo.

Midugang ang gobernador   sa pag-ingon nga igo lamang niyang gihimo ang usa ka tukmang desisyon pagtabang sa PDEA ug dili kini angayan nga sawayon sa ilang kritiko. (BANAT NEWS)