CEBU, Philippines - Mihimo og mass motion ang konseho sa siyudad sa Sugbo kagahapon aron madali ang pag-release sa nahibiling mid-year bonus alang sa kapin sa singko mil ka kawani sa Cebu City Hall. Ang konseho mipadayag nga ila kining gituyo aron dunay igong salapi ang ilang mga empleyado panahon sa Pasko sanglit ila man sad nga idungan ang nahibilin nga P2,500 nga cash gift.
Paningkamotan sa kagamhana sa siyudad sa Sugbo nga ila kining mahatag sa dili pa mahuman ang buwan sa Nobiyembre.
Samtang usa ka empleyado sa City Hall nga nadumili pagpaila misaysay dinhi sa Banat News nga dako na kaayong tabang kanila ang sayo nga paghatag sa mid-year bonus ug cash gift.
“Maayo na lang kaayo na, kay kasagaran man gud sa gobiyerno malangan ang paghatag sa mga bonuses. Maisip na namo nga early Christmas gift nga among madawat,” matud pa niini.
Dugang pa niya nga mapasalamaton usab siyang wala maapektahi sa kasungian sa executive ug legislative department sa City Hall ang ilang bonus.
Matud pa niya ga nagpakahilom lang ang mga empleyado sa City Hall gumikan kay igo ra sila mobuhat sa ilang mga trabaho ug dili mag-apil apil sa away sa ilang mga labaw. (BANAT NEWS)