Gibiyaan sa kapuyo nagbitik sa liog patay

CEBU, Philippines -  Usa ka 19-anyos nga lalaki nadugang sa talaan sa mga naghikog niining semanaha human kini gikatahong gibiyaan sa iyang kapuyo tungod sa ilang panaglalis.

Ang paghikog nahitabo sa sitio Tunga sa barangay Cantuod lungsod sa Balamban niadtong Martes sa alas 7:30 sa gabii diin usa ka Diego Canedo Bucag,19, nagpuyo sa maong lugar.

Matud ni SPO4 Allan Patalingjug sa Balamban Police sa pakighinabi sa Banat News base sa ilang imbestigasyon ang mga silingan nakadungog nga nag-away si Bucag ug kapuyo niining si Emily Pacaña, 32-anyos.

Apan ang kapuyo niining si Emily milakaw sa balay ug wala magpapugong.

Ang maguwang ni Bucag nga si Gabriel mao nay nakadiskubre nga nagbitay na ang iyang manghod sulod sa kwarto nga wala nay kinabuhi, usa ka gilubid nga habol ang gigamit paghikog nga gihikot sa liog ni Bucag ug ang tumoy gibaat sa palaros sa ubos nga bahin sa atop.

Dugang nahipos nga impormasyon nagselos si Bucag ngadto sa iyang kapuyo human kini magdudang adunay laing lalaki kining gikarelasyon.(EIM)(BANAT NEWS)