Maestro gikiha'g pangmolestiya

CEBU, Philippines - Mga kasong kriminal   ug administratiba ang gipasaka batok sa usa ka magtutudlo   kinsa gikiha sa kasong pagmolestiya   sa iyang 15 anyos nga estudyante.

Ang suspetsado usa ka 49 anyos nga giila lang sa ngalang Boy (di tinuod niyang ngalan) kinsa usa ka class adviser gawas sa iyang pagka-maestro, minyo nga taga barangay Cogon sa maong lungsod.

Samtang ang biktimang dalagita   giila lang usab sa ngalang Chery (di tinuod niyang ngalan).

Unang gipasaka   sa biktima nga gisuportahan usab sa iyang inahan ang kasong kriminal batok sa suspetsado ngadto sa Provincial Prosecutor’s Office niadtong Nobiyembre 3, 2011 sa hapon.

Samtang ang kasong administratiba gisang-at usab niadtong Martes sa hapon.

Sa affidavit sa biktima gisaysay niini nga niadtong Oktobre 24, 2011 sa alas 4:30 sa hapon nakigmiting kanila ang ilang maestro sulod sa ilang classroom.

Apan human sa miting nanggawas dayon ang tanan niyang mga kauban ug siya nalay naulahi busa nananghid siya sa iyang maestro nga mogawas na siya.

Apan matud pa wala siya tugoti sa suspek ug hinuon miduol kini kaniya uban sa paghikap sa iyang mga bukton ug miingon nga iyang ilisan og P1,800 ang nawala nga cell phone niini.

Apan wala mosugot ang biktima tungod kay gusto na gyud niini nga makapauli na siya, apan kalit siyang gibunlot   sa suspek ug giguyod ngadto sa ilang kitchen diin didto hugot kaayo siyang gigakus.

Apan matud pa sa biktima nga gumikan sa pagpanlimbasog niya naka-eskapo siya gikan sa mga bukton sa iyang maestro ug mikaratel siya og dagan paingon sa gawas sa maong lawak.

Apan tungod sa pagdali-dali gumikan sa kahadlok nga maapsan   sa iyang maestro nabangga ang biktima sa pultahan hinungdan sa pagkabun-og sa iyang tuhod   ug didto nabantayan siya sa uban niyang mga classmate nga diha pa sa gawas sa classroom niadtong tungora.

Gumikan sa hilabihang kalisang, gisugo nalang sa biktima ang iyang classmate nga mao nalay mokuha sa iyang bag nga nahabilin sulod sa classroom ug mideretso nalang siya sa pag-uli sa ilang balay nga wala motug-an sa ilang mga classmate sa nahitabo kaniya.

Pagka- ugma iya nang gitug-anan ang iyang inahan sa nahitabo kaniya busa gikuyogan dayon siya niini sa pagsumbong    ngadto sa buhatan sa kapolisan sa maong lungsod.

Gisukip sa reklamo sa biktima ang medical certificate niini gikan ni Dr. Jackielou Sandigan ingon man ang Psychological report gikan sa Vicente Sotto Memorial Medical Center (VSMMC).

Gisuwayan og kuha ning tigbalita ang habig sa maestro apan pakyas sa pagkontak sa suspetsado. (BANAT NEWS)