40 ka pamilya sa Barrio Luz demolison

CEBU, Philippines -  Dul-an sa 40 ka pamilya sa tulo ka mga sitio sa Barrio Luz ning dakbayan ang nagpatabang sa buhatan ni Mayor Michael Rama gumikan sa nadawat nga demolition order gikan sa korte.

Ang nahisgutang mga pamilya nagpuyo sa sitio Mabuhay, Lubi ug Nangka ug gitagalan sa korte og 45 ka adlaw sa pagbiya sa ilang nahimutangan.

Apan ang usa ka lumulupyo sa maong barangay nga si Lolita Barellano misaysay nga dugay na siyang nagpuyo sa maong luna sukad pa niadtong 1979 ug ang maong dapit maoy gihimong relocation site kaniadto sa dihang gidemolis ang iyang pinuy-anan sa pier area.

Gipadayag ni Barellano nga andam siya mobayad sa gobiyerno sanglit yuta man kini sa gobiyerno aron maiya ang gitarukan sa ilang balay.

Dugang pa niya nga dili siya ganahan nga moapil sa homeowner's association sa ilang lugar gumikan sa kadako sa ilang bayranan.

Matud pa niya nga kung mag-agi og national nga ahensiya, mas modako ang ilang bayranan sanglit duna may interest kung masipyat sila og bayad sa binuwan nila nga obligasyon.

Ang Division Welfare for the Urban Poor nga gidumala ni Atty. Collin Rosell maoy gitahasan sa mayor nga mosusi sa maong problema ug karon gitun-an na niini ang Community Mortgage Program nga gi-avail kaniadto sa mga lumulupyo sa maong dapit. (BANAT NEWS)