Paeksaminon sa magpolis babaye na

CEBU, Philippines -  Gihangop sa kadagkuan sa Police Regional Office-7 ang sugyot ni Cebu Vice Governor Agnes Magpale sa pagpagamit sa mga babayeng doktor sa Integrated Provincial Health Office (IPHO) aron maoy mo-examine sa mga babayeng mosulod sa pagkapolis.

Si PRO-7 Chief Supt. Marcelo Garbo Jr., nagkanayon sa mga tigbalita nga dako kining tabang sa kapulisan human sa makontrobersyal ang usa ka lalaking doktor sa Regional Health Service sa PNP nga gireklamong mimolestiya sa usa ka aplikanteng babaye atol sa eksaminasyon niini niadtong nakalabay’ng buwan.

Apan alang kang Garbo kinahanglan nga ipaagi kini sa proseso sama sa pagsusi sa National Police Commission (Napolcom) aron dili ma-technical ang police kung mogamit og laing ahensya sa gobiyerno ang kapulisan alang sa recruitment.

Sa iyang bahin ang hepe sa Regional Health Services nga si Supt. Antoniette Langcauon nga na-interbyu sa TV5 nagkanayon nga dunay patakaran ang pagkuha og mga babayeng doktor nga maoy mohiling sa mga babayeng police recruits. (BANAT NEWS)