Joavan gireklamo na pud

CEBU, Philippines -  Wala pa maabti og 24-oras gikan moreklamo ang usa ka traffic enforcer tungod sa pagpanghulga sa hinablos sa mayor sa Talisay nga si Joavan Fernandez laing reklamo na usab ang giatubang niini human pasanginling namunal og botelya sa usa ka tawo kagahapon sa kaadlawon.

Ang pagpamunal gikatahong nahitabo diha sa kan-anan nga baligyaanan og litsong manok sa barangay Tabunok diin usa ka Regie Aranas, 24, nga taga barangay Bulacao, Pardo, dakbayan sa Sugbo ang biktima.

Si Aranas gidala sa mga polis ngadto sa Talisay City Police Station human sa hitabo dayon gihatud ngadto sa Talisay City District Hospital tungod sa naangkong gisi sa ulo niini tungod sa gialegar      nga pagbunal og botelya ni Joavan.

Sa imbestigasyon sa kapolisan si Aranas uban sa iyang mga higalang mga babaye diha sa maong kan -an ug dihang mobayad na unta si Aranas sa ilang bill sa kahera giingong giduol ni Joavan ang mga kaubang babaye ni Aranas ug gibugal-bugalan.

Tungod niini giduol ni Aranas si Joavan ug gibadlong apan giingong nasuko ang sinagop sa mayor ug kalit gihapsan sa gibitbit niining botelya sa ilimnong makahubog ang ulo ni Aranas.

Si Joavan nga nahinabi sa Banat News mihimakak sa pasangil nga iyang gibugal-bugalan ang mga kuyog ni Aranas. Wala sad siya moangkon o mohimakak sa pasangil nga pagpamunal niya og botelya.

Matud niya nga iyahang gikomediyahan lang ang babaye ug wala siya mahibalong aduna kini kaubang lalaki ug nahibulong na lang siya nga hait kaayo og tinan-awan niya si Aranas.

Tungod niini iyang gipangutana si Aranas nganong hait kini og tinan-awan kaniya ug iyang gipasidan-an sa pag-ingon: “kompiyansaha nimo, wa ka kaila nako?”

Matud pa ni Joavan gitabisan gikan sa ulo hangtud sa tiil siya og maayo niini dayon mitubag og :“Kaila, guard. Ngano man diay?”

Si Joavan nagkanayon nga niadtong higayona nakainom siya apan dili siya hubog ug nahagit (nainsulto) lang siya sa tubag ni Aranas nga arogante kaayo.

Niadtong Lunes, si Joavan gireklamo sa traffic enforcer nga si Marlorence Monreal kinsa mipasangil nga gihulga siyang rakrakan niini og armalite human niya babagi tungod sa kalapasan sa lagda sa trapiko diha sa barangay Tabunok.

Giingong si Joavan gikan sa walang lane sa karsada diha sa Tabunok kalit kining misimang sa tuo ug mipasutoy og padagan sa iyang sakyanan bisan og “stop” ang signal sa traffic light.

Apan si Joavan mitubag sa Banat News kagahapon ug misumbalik og pasangil kang Monreal nga kini maoy arogante kaayo nga traffic enforcer, matud pa niya nga niadtong milabay’ng bulan gihapak ni Monreal ang likod sa iyang sakyanan ug dihang iyaha kining gipangutana arogante kining miingon “tan-awa ang signboard.”

Niadtong Lunes sa buntag giangkon niining milahos siya og padagan sa iyang sakyanan tungod kay naapiki siya sa traffic light ug natungnan nga si Monreal gihapon ang misita kaniya ug nagdupa-dupa kini diha sa karsada.

Apan gihimakak ni Joavan ang pasangil nga gihulga niya kining dalhan og armalite si Monreal.

“Siya nalay daginuton nako, akong singko ibaylo nako og piso?” ni Joavan pa.

Hinuon matud sa sinagop sa mayor nga atubangon niya ang reklamo ni Monreal ug Aranas kun moduso gyud sila og reklamo batok kaniya.

Sa iyang bahin, ang hepe sa kapolisan sa dakbayan sa Talisay nga si Supt. Eddie Recamara nagkanayon nga ang maong mga reklamo ubos sa barangay level.

Si Tronando Lastimosa ang vice chairman sa City of Talisay Traffic Operation Development Authority (CT-TODA) nga nahinabi sa Banat News kagahapon nagkanayon nga wala silay nadawat nga report kabahin sa gipasangil ni Joavan ngadto sa iyang enforcer nga si Monreal nga gihapak ang SUV niini.

Gidayeg hinuon ni Lastimosa si Monreal sa kaisog pagsitar sa sinagop sa mayor apan dili siya katuo nga mag-arogante si Monreal ilabi na niadtong higayona BMW ang gisakyan ni Joavan. (EIM) (BANAT NEWS)