Isalikway ang pagdumot - Muslim leader

CEBU, Philippines - Angayang wad-on ang pagdumot sa isigkatawo aron makab-ot ang kalinaw sa nasud.

Mao kini ang mensahe sa director sa National Commission on Muslim Filipinos (NCMF-7) nga si Malo Manoggiring atol sa ilang pagselebrar sa Eid Al Adha nga mao ang piyesta sa pagsakripisyo sa mga Muslim sa tibuok kalibutan.

“Hindi ka dapat magtanim ng galit sa kapwa mo at iyan ay pagpapakita ng sakripisyo. Kung wala kang kaaway, mas mapayapa ang ating bayan,” sumala pa ni Manoggiring sa dihang nahinabi sa Banat News kagahapon.

Panghinaut ni Manoggiring nga masulbad na unta sa dili madugay ang kagubot karon didto sa Mindanao .

Panawagan niya sa mga rebelde nga mobalik sa sabakan sa gobiyerno aron masulbad na ang kagubot sa maong dapit nga nakaapekto pag-ayo sa mga sibilyan.

“Dapat bumalik na sila (mga rebelde sa Mindanao) sa gobiyerno, para makamit ang kapayapaan,” sumala pa ni Manoggiring.

Samtang moabot   kapin sa 2,000 ka mga Muslim ang nag-ampo kagahapon sa Al Khaitiah Mosque sa Basak San         Nicolas.

Gipanawagan sa Muslim community sa Sugbo ang pagsinabtanay sa tanang tawo sanglit mao kini ang instrumento sa pagkab-ot sa kalinaw.

Nasayran usab nga moabot ngadto sa tulo ka milyong Muslim gikan sa 186 ka mga nasud ang nagtapok didto sa Mecca alang sa Eid Al Adha. (BANATNEWS)