Tag-iya'g tarima sa Lagtang giwarningan

CEBU, Philippines - Ang mga tarima sa bag-ong merkado sa Lagtang, sa dakbayan sa Talisay nga wala pa tindahi sa nanag-iya niini, ihatag sa kagamhanan ngadto sa laing aplikante gawas kung ang maong mga tag-iya    mogamit niini karong semanaha, matud pa ni City Administrator Richel Bacaltos.

Si Bacaltos nga nahinabi sa Banat News kagahapon nagkanayon nga ang bag-ong merkado adunay 300 ka mga tarima ug pulos na kini adunay mga tag-iya apan sa pagkakaron mga 30 porsiyento sa mga naghupot niini wala pa maninda.

Ang mga tarima mao ang mga lamesa nga puthaw nga nahimutang sa section sa mga buwak, prutas ug buwad .

Matud ni Bacaltos nga karong semanaha padalhan na nila og abiso ang mga nanag-iya og tarima nga sulod sa pito ka adlaw kung dili pa nila kini tindahan ihatag na nila kini ngadto sa laing mga negosyante nga gustong maninda.

Gibutyag ni Bacaltos nga ang maong sistema nahilakip sa probisyon sa kontrata sa mga vendor nga naghupot og mga tarima o mga pwesto.

Sa laing bahin, ang pribadong merkado nga gidumala sa pamilyang Nacario sa Tabunok atbang sa kanhi merkado publiko gitakda usab nga ipasira sa siyudad.

Matud ni Bacaltos nga ang nahisgutang pribadong merkado maoy usa sa nakita nilang hinungdan nga   dyutay ray mamalit sa merkado sa Lagtang.

Ang City Administrator nagkanayon nga ang operasyon sa maong merkado walay pagtugot sa siyudad ug ang business permit nagtugot lamang sa tag-iya nga “lessor” o nagpaabang. (BANATNEWS)