Santos may cellphone sa prisohan?
CEBU, Philippines - Gihimakak ni Naga City Jail Warden Sr. Insp. Genesis Mongcopad ang mga pasangil nga may special treatment sa bilanggong si Bella Ruby Santos pinaagi sa pagtugot kaniyang makadala og cellphone sulod sa prisohan.
“I challenge whoever is that person, produce the evidence that I violate law and file a complaint,” butyag pa ni Mongcopad.
Matud pa ni Mongcopad sa dihang nahinabi sa Banat News nga wala gyuy kamatuoran ang mga estoryang migawas nga gitugotan niya si Santos nga makagamit og cellphone sulod sa prisohan.
“ We strictly implement the rules and regulation inside the jail,” pasabot pa ni Mongcopad.
Dako ang pagduda ni Mongcopad nga ang nagpakatag og estorya kalabot niini adunay dakong motibo nga giangkon usab niyang wala pa niya madiskubrehi.
Tungod niini iyang gihagit karun kun si kinsa man ang nagpakatap niini nga mosang-at og reklamo batok kaniya ug mopresentar og mga ebidensya.
Si Santos maoy gi-akusahang midagit ug mipatay sa 6-anyos nga si Ellah Joy Pique, kauban ni Santos sa maong kaso ang iyang uyab nga Briton nga si Ian Charles Griffiths. (BANATNEWS)
- Latest
- Trending
