Anti-Discrimination Bill gilaumang mapasar sa Kongreso

CEBU, Philippines - Ang Ladlad Partylist malaumong mapasar sa Kongreso ang dugay na nilang gipangandoy nga Anti-Discrimination Bill nga tumong mao ang proteksyon sa tanan gikan sa diskriminasyon.

Matud pa sa chairperson sa Ladlad Partylist, Bemz Benedito sa diha nga nahinabi sa Banat News nga sulod sa 13 ka tuig wala gyud mapasar ang maong bill hinungdan nga ila kini karun nga gipangusgan nga maduso kini sa Kongreso.

Midugang si Benedito nga niadto pang tuig 1998 gisugdan og duso unta sa Bayan Muna Partylist ang maong bill apan wala kini mapasar sa kongreso, sunod nga miduso niini mao ang Akbayan Partylist ug gikatakdang himuon ang unang hearing niini.

Nanghinaot si Benedito nga aprubahan unta kini ni Presidente Benigno Noynoy Aquino III aron mahunong na ang mga pagbugal-bugal sa mga transgender, bayot ug tomboy.

Butyag usab ni Benedito nga dili lang ang mga third sex ang mapanalipdan sa maong balaudnon tungod kay alang kini sa tanan batok niadtong mga walay respeto sa isig ka ingon.

Ning bag-ohay lang adunay mga reklamo ang mga bayot dinhi sa Sugbu kabahin sa duha ka insidente sa pagpangrakrak og BB pellets gamit ang airsoft gun sa ilang mga kauban.

 “Let’s stand united and harmonious; there is no challenge too great to overcome. Let’s fight discrimination and injustice,” pasabot pa ni Benedito. (BANATNEWS)