Rama mihagit sa mga graduates sa MCC

CEBU, Philippines - Gipahalipayan ni Cebu City Mayor Michael Rama ang mga tinun-an sa Mandaue City College (MCC) Tipolo Campus nga gidumala ni Dr. Paulus Marie Cañete sa gipahigayon nilang commencement exercises diha sa Montebello Villa Hotel sa barangay Apas sa dakbayan sa Sugbo niadtong miaging Sabado sa gabii.

Kauban ni Rama sa pagtambong si A Teacher Partylist Representative Julieta Cortuna kinsa mihatag usab sa iyang mensahe isip keynote speaker niini.

Si Rama nga maoy guest speaker sa iyang mensahe midasig ngadto sa maong mga tinun-an paggamit sa ilang propesyon aron matabangan ang paglambo sa nasud.

Ang maong tunghaan miagi og mga kontrobersya tungod sa wala pag-ila kanila sa dakbayan sa Mandaue ug sa Commission on Higher Education ug ang pagsuway pagbabag sa ilang mga gradwado nga makakuha og pasulit sa Professional Regulatory Board hangtud nga ang korte na maoy miisyu og temporary restraining order aron lang sila makakuha og pasulit.

Si Rama mitataw nga dili ikalimod nga adunay mga pagsulay nga masinati apan kining tanan malabyan lamang kun magpabiling lig-on ang pagkigbisog hangtod nga makab-ot gayod ang gitinguhang kalampusan.

Samtang si Cortuna mipadayag nga wala malilong sa iyang buhatan ang nasinating kakulian sa maong tulunghaan nga nakahatag kaayo og dakong kahasol sa mga tinun-an.

Matud pa niya nga epekto kini sa naghinobrang pamolitika sa mga hingtungdan.

Mokabat sa 70 ka mga tinun-an ang migradwar sa lain-laing kurso nga naglakip sa Master in Education, Diploma In Professional Education, Bachelor of Science in Industrial Technology, Associate in Industrial Technology ug uban. (BANAT NEWS)