Nagtago sud sa 10 Tuig wanted 'Dakpan

CEBU, Philippines - Human sa napulo ka tuig nga pagtagotago gikan sa balaod nasikop sa kapolisan ang usa ka suspek sa pagpatay nga nahitabo sa dakbayan sa Talisay apan didto na sa Zamboanga del Sur madakpi.

Ang wanted sa kasong murder giilang si Alejandro Sisona, 54, kinsa nasikop sa kapolisan sa Sibucao, Dumalinao, Zamboanga del Sur sa milabay pang buwan apan niadtong Sabado pa kini gihatud sa kapolisan sa Zamboanga diha sa kapolisan sa dakbayan sa Talisay.

Si Sisona giaresto sa mga polis ubos sa warrant of arrest sa kasong murder batok kaniya nga giluwatan ni Regional Trial Court (RTC) Judge Gilbert Moises sa Branch 18.

Ang mga warrant servers sa Talisay City Police Station nga sila si SPO3 Frederick Larrobis ug PO3 Arnold Damasco mibutyag nga nakadawat sila og impormasyon kabahin sa nahimutangan ni Sisona hinungdan nga nangayo sila og tabang sa kapolisan sa Zamboanga aron kini masikop.

Si Sisona wala dayon mahatud nganhi sa Sugbo tungod sa heightened alert nga gipatuman didto tungod sa nahitabong kagubot mugna sa mga rebeldeng Muslim.

Si Damasco mibutyag sa Banat News nga ang pagpatay nga gipasangil kang Sisona nahitabo niadto pang tuig 2001 diha sa sitio Tabulasan, barangay San Isidro, dakbayan sa Talisay.

Matud ni Damasco nga si Sisona kaniadto nagpuyo sa Meadowland Subdivision, barangay Pakigne, lungsod sa Minglanilla ug misuroy diha sa dakbayan sa Talisay nianang hitaboa dihang gipareglahan diha sa barangay San Isidro ug human niini mibalik ug mibawos ug napatay ang namaregla kaniya.

Human niadto mitago na si Sisona hangtud nga nasayran nalang nilang atoa kini magtago na sa Mindanao. (EIM) (BANAT NEWS)