CEBU, Philippines - Dako og ikatabang sa Philippine Drugs Enforcement Agency (PDEA)-7 ang mga ayuda ni Governor Gwendolyn Garcia sa kampanya pagsumpo sa illegal nga drugas dinhi sa lalawignan sa Sugbo ug sa Central Visayas.
Kini ang giluwatang pamahayag ni Carlito Ermac, ang K9 dog chief sa PDEA-7, human gikahinabi niini si Gov. Garcia atol sa naandang pagsuroy sa gobernador sa South Bus Terminal.
Matud pa ni Ermac nga dako kaayo og ikatabang ang gilaraw ni Garcia nga mopalit og 20 ka mga K9 dog aron may magamit sa pagpangita sa mga kontrabando ug ilabi na sa illegal nga drugas.
Gawas pa niini, gitataw usab ni Ermac kun mahinayon ang gilaraw sa gobernador nga patukoran ang PDEA og kaugalingong edipisyo didto sa yuta sa Kapitolyo sa Lahug, mao na kini ang ilang kabutangan sa mga kahimanang high tech sa maong ahensya. Sa sayo pa, daan nang gipahayag sa gobernador nga ang iyang tinguha mao ang hingpit nga pagsanta sa kalihokan sa gidiling drugas dinhi sa lalawigan. (BANAT NEWS)