Lolo natagak sa pangpang patay

CEBU, Philippines - Patay nang napalgan ang usa ka 73-anyos nga lolo human kini matagak sa pangpang daplin sa dagat sa sitio Badiang sa barangay Camobo-an sa lungsod sa Tabogon sa alas 6:00 sa buntag niadtong Sabado. Ang napalgang patay mao si Aquilino Catam-isan, 73, nagpuyo sa maong lugar ug gihulagway sa mga kabanay nga giango-ango na.

Matud ni PO3 Gregorio Licayan sa Tabogon Police Station dihang nahinabi sa Banat News ang mga kabanay niini mibutyag nga milakaw si Catam-isan nga wala mananghid sa iyang anak diin siya magpuyo nianang Biyernes pa sa gabii.

Wala magdugay ang mga kabanay nangita dayon kaniya sa pagtuo nga nagpatuyang lang kini og lakaw tungod sa iyang pangidaron apan wala gyud nila kini makit-i.

Apan nianang pagkasayo sa buntag gipahibawo nalang sila nga nakit-an nalang nga nagbuy-od ilawom sa pangpang nga kabato-an daplin sa dagat si Catam-isan sa sitio Badiang nga wala nay kinabuhi.

Sa gihimong pakisusi sa kapolisan nasuta nga nalungag ang agtang ug baba sa maong lolo nga gituohang tungod sa pagkaigo niini sa bato human kini matagak sa pangpang.

Ang mga kabanay nagtuo nga walay foul play ang kamatayon ni Catam-isan tungod usab kay gihulagway nila nga wala na kini sa maayong pangisip tungod sa katiguwangon. (BANAT NEWS)