Dunggan sa bana giabis sa asawa

CEBU, Philippines - Nagbitay na ang dalunggan sa usa ka bana ug samdan usab ang nawong niini human gihiwa ug gibunalan sa asawa pasado alas- 7 sa miaging gabii sa barangay Daan Lungsod sa lungsod sa Tuburan.

Ang biktima nailhan nga si Sofronio Ariza, 45, ug ang iya ra usab asawa nga si Annabella Ariza, 35, maoy miunay og pasakit kaniya.

Sa pakighinabi sa Banat News ni PO2 Ariel Maravillas, sa Tuburan Police Station mibutyag kini nga ang bana personal nga midangop sa ilang buhatan ug misumbong sa iyang nahiaguman ngadto sa iyang asawa.

Matud pa sa bana nga aduna sila’y gilalisan apan taliwala sa ilang panaglalis kalit lang nga mikuha og mahait nga hinagiban ang iyang asawa ug gidiretso siya og tigbas sa ulo apan nakalihay siya apan naabtan ang iyang tuong dalunggan nga diriyot naputol.

Wala pa gyud matagbaw ang iyang asawa mikuha kini og kahoy ug gibunalan siya sa agtang ug sa iyang nawong. Si Sofronio gidala sa Tuburan District Hospital alang sa pagtambal.

Nagduda si Marevillas nga posibleng selos ang hinungdan sa panag-away sa duha base usab sa impormasyon nga ilang nakuha. Apan kagahapon matud pang Marevillas nagpinirmahay ang duha nga dili na sila maghilabtanay sa usa’g-usa. (EIM) (BANAT NEWS)