CEBU, Philippines - Gipaabot nga makadawat og pasidungog ang mga polis nga sakop sa Cebu Provincial Police Office (CPPO) nga responsable sa pagkasakmit sa 6,000 ampules nga nubain dinhi sa Sugbo sa milabay’ng bulan nga balor P1.8 milyones.
Ang gipaabot nga makadawat sa pasidungog atol sa flag raising ceremony sa CPPO karong petsa 14 ning buwana sa buntag mao sila si Supt. Henry Biñas, ang hepe sa Provincial Investigation and Detection Management Branch (PIDMB), PO3 Cesar Pandong, PO3 Carlo Veloso, PO2 Frederick Ybañez, PO2 Albert Luardo ug PO1 Esmeraldo Quillosa.
Ang grupo maoy nakadakop sa usa ka nurse nga si Leonarda Lim kinsa sumala pa sa nahaunang report ni Biñas maoy posibleng usa sa nagsuplay og nubain sa barangay Kamagayan sa dakbayan sa Sugbu diin maghitak ang maong drugas.
Si Senate majority leader Vicente “Tito” Sotto III maoy nangita og paagi aron mahatagan sa maong pasidungog ang maong mga sakop sa kapulisan tungod sa malampusong pagkasakmit sa daghang mga nubain nga gihulagway nga maoy labing dakong operasyon nga nahimo sa mga polis sukad na re-classify nga dangerous drugs ang nubain.
Apan di makatambong atol sa awarding ceremony si Sotto apan representahan kini ni kanhi Dangerous Drugs Board (DDB) Undersecretary Paul Clarence Oaminal.
Kini gipahaom atol usab sa pag-obserbar sa Drug Abuse Prevention and Control Week karong bulana nga nagdala sa tema nga “Mahalon ang Kinaiyahan, Lawas Ampingan, Druga Likayan”.
Nasayran nga si Sotto mao pay chairman sa DDB kaniadto dihang gi-lobby niini ang pag re-classify isip dangerous drugs ang nubain.
Subay sa press statement nga giluwatan gikalipay sa senador ang pagkasakmit sa maong mga nubain tungod kay daghan usab ang mga Sugboanon ang nagumon pag-abuso niining maong matang sa tambal.
Si Biñas sa iyang bahin sa pakighinabi sa Banat News nagpasalamat sa senador ug ni Oaminal nga giila ang ilang trabaho. (BANAT NEWS)