2 'esnatser' gipatay

CEBU, Philippines - Naligo og bala ang duha ka lalaki human gipamusil sa wala mailhing tawo pasado alas-4 kagahapon sa hapon diha sa S. Osmeña Blvd. sa barangay Tejero ning dakbayan.

Ang gipamusil mao silang Francisco Bencila, 25, taga sitio Silangan, barangay Tinago ug kaubang nailhan lang sa pangalang ‘Gardo.’

Sa pakighinabi sa Banat News ni PO3 Geoffrey Gutual, sa Cebu City Police Office Homicide Section ang duha gikatahong nagbarog sa nahisgutang lugar uban sa tulo ka wala mailhing tawo.

Sa kalit lang nga mipatim-aw ang usa ka lalaking nagsuot og helmet ug sa walay igong hinungdan gipamusil sa mga biktima hinungdan nga nagkatibulaag og panagan ang mga kaubanan sa biktima.

Sumala pa nga nakatikang pa og pipila ka metros ang duha apan gisundan kini sa mamumuno ug gipangtiwasan.

Matod pa ni Gutual nga base sa mga estorya sa nakakita, misibat ang mamumuno sakay sa usa ka itom nga motorsiklo nga gimaneho sa kauban niini pipila ka lakang gikan sa crime scene.

Pito ka kabhang sa kalibre .45 nga gituohang maoy gigamit sa pagpamusil ang nakuha diha sa crime scene.

Ang mga biktima nakaangkon kini og daghang samad pinusilan sa nagkadaiyang parti sa ilang kalawasan ug sa ulo.

Si Gutual nagsubay na karon sa record sa duha human sila makadawat og impormasyong giingong mga ‘esnatser’ sila sa maong lugar.

Samtang ang inahan ni Bencila nga si Sergia, mibutyag sa kapolisan nga nianang Sabado sa gabii nag-inom ang iyang anak, si Gardo, ug pipila nila ka higala ug nadunggan niya si Gardo nga nangumbinsir sa iyang anak nga ‘mangigo’ na usab sila. Ang ‘mangigo’ sa lenguwahe sa karsada nangahulogang manghilabot.

Gisalikway hinuon ni Gutual nga vigilante- style killing ang nahitabo tungod kay posibleng panimalos ang motibo sa kriminal tungod sa impormasyong nadawat sa kapolisan bahin sa binuhatan sa mga biktima. (BANAT NEWS)