Inahan mikiha sa anak tungod sa pagsuway pagpatay kaniya

CEBU, Philippines - Gipasakaan og kasong Attempted Parricide sa Cebu City Prosecutor’s Office ang usa ka lalaki human giingong misuway pagpatay sa iyang inahan atol sa ilang komprontasi.

Si Richard Delluva, 30, molupyo sa B. Rodriquez St., Sambag II,nag-atubang na og kasong attempted parricide sa Regional Trial Court nga gipasaka sa iyang inahan nga si Nelia Delluva, 60.

Si Prosecutor Alexander Acosta miduso sa maong kaso ngadto na sa korte kini human iyang nakita nga aduna gyuy probable cause aron masang-at ngadto sa korte ang maong kaso. Matod pa ni Acosta nga ang akusado mipili nga dili nalang mopaubos sa preliminary investigation aron unta tubagon ang alegasyon nga gisang-at batok kaniya.

Si Acosta mirekomendar og P40 mil nga piyansa batok ni Delluva alang sa iyang temporaryong kagawasan. Sa gibuhiang affidavit ni Nelia, 60, inahan sa akusado mibutyag kini nga ang iyang anak usa ka drug dependent ug kanunay’ng manggubot sa ilang tindahan.

Usa niana mao ang pagpangguba niini sa ilang tindahan ug dihang iyang gipangutana unsay problema gikatahong gisuwayan siya og kulata niini apan nakalihay siya.

Apan mikuha ang iyang anak og kahoy nga adunay lima ka pulgadang lansang ug gisuwayan siya sa pagpatay gamit niini. “For fear of my life as he started to hit me with the piece of wood, I ran away and took refuge to my room and have it padlock,” matud pa niini.

“It is not the first time that my son has attempted to kill me for he is always planned to kill me as a matter of fact I rent and live in other place just to evade his evil desire to kill me,” dugang pa sa pamahayag sa inahan. Nasayran nga ang silingan ni Nelia mao nay nanawag og pakitabang sa kapolisan ug barangay tanod aron masikop ang akusado. (BANATNEWS)