Resolusyon sa oposisyon wa babagi - Odilao

CEBU, Philippines - Si Konsehal Bernard Odilao sa dakbayan sa Talisay mihimakak sa report nga kanunay’ng babagan sa mga konsehal sa administrasyon ang mga idusong sugyot sa mga konsehal nga sakop sa kampo sa oposisyon.

“I am slighted by this report nga niingon nga pirmi namong babagan ilang resolusyon. It is not blocking it, gi-refer ra namo sa proper committees kay mao man nay naa sa House Rules”, pasabot pa ni Odilao.

Ang maong reaksiyon ni Odilao mitumaw human siya makabasa sa report sa usa ka lokal nga pamantalaan nga giingong ang administrasyon kanunay’ng mobabag sa idusong mga resolusyon sa minoriya ngadto sa konseho.

May pasangil pa nga ang giingong mga gibabagan nga resolusyon kopyahon kuno sa administrasyon ug sila   nay moduso niini ngadto sa konseho.

Apan matud ni Odilao nga base sa ilang House Rules ang konsehal nga adunay committee chairmanship lang ang maka-sponsor og resolusyon o ordinansa.

Ang tulo ka mga konsehal sa minoriya nga sila si Danny Caballero, Val Ylanan ug Romeo Villarante pulos walay gikuptang komitiba.

“Nakapasar naman na sila og mga resolusyon ug ordinance, wa man mi moreklamo. Ka na lang gyud kung tan-aw namo nga kinahanglan pang i-refer or estudyohan sa involved committee, then we refer their proposals”, ni Odilao pa.

Si Odilao mipasabot usab kabahin sa giduso niyang resolusyon nga mao ang pag-release sa $10,000 nga donasyon sa M/V United Majuro diin ang maong kwarta gamiton sa pag-ayo sa tulo ka mga marine protected area sa siyudad.

Matud niya nga ang nahisgutang resolusyon nga naaprobahan sa konseho sa milabay’ng semana dili duplicate sa resolusyon ni Konsehal Caballero.

Si Odilao nagkanayon nga ang resolusyon nga giduso ni Caballero naghangyo lang kini kang Mayor Socrates Fernandez nga ilisan ang mga nangaguba nang boya sa Lagundi Reef human kini daruha sa M/V United Majuro niadtong Marso, 2009 samtang ang iyaha (Odilao) nagsugyot sa pag-release sa donasyon.

Ang maong resolusyon ni Caballero   gipugngan sa konseho tungod kay giingong aduna nay susamang resolusyon niini nga napasar na. (BANATNEWS)