Presyo sa pasta hayan mosaka

CEBU, Philippines - Gipaabot nga mosaka ang presyo sa mga manufactured food products karong mosunod nga mga semana sumala pa sa Department of Trade and Industry sumala pa sa report sa DzBB sa GMA News.Tv.

Matud pa sa DzBB niadtong Biyernes sa buntag, ang mga produktong giingong posibleng mosaka ang presyo ngadto sa 25 porsiyento mao ang mga pagkaong sama sa pasta nga sagad gamiton sa spaghetti sa Pasko.

Matud pa sa report nga ang maong pagtaas gipahibalo nang daan sa mga food manufacturers ngadto sa DTI nga ipatuman hayan sa mosunod nga mga semana sa dili pa ang Pasko.

Apan si Department of Trade and Industry (DTI)-7 regional director Asteria Caberte mibutyag nga wala pa sila makadawat og susamang report o pahibalo gikan sa ilang buhatan kabahin niini.

Si Caberte nga nahinabi sa Banat News niadtong Biyernes nagkanayon nga wala silay nadawat nga report gikan sa mga manufacturers dinhi nga mopataas sa mga presyo sa ilang mga produkto sa dili pa ang Pasko.

Sa pagkakaron higpit nilang gi-monitor ang tanang mga produkto diha sa kamerkadohan.

Sa ulahing report sa ABS-CBN Bandila ang DTI miawhag sa publiko nga niining layo pa ang Pasko ug mentras wala pa mosaka ang mga presyo sa palaliton kinahanglan nga mamalit na silang daan. (BANATNEWS)