Mga cellphone ug cash nasakiyo sa tulisan

CEBU, Philippines - Mga cellphone ug kwarta ang nasakiyo sa duha ka mga batan-ong tulisan nga mitulis sa tindera sa usa ka cellshop sa Victoria Village barangay Valladolid siyudad sa Carcar niadtong Huwebes sa alas 7:00 sa gabii.

Ang biktima mao si Kimberly Emelgo, 18, molupyo sa Lower Taog, barangay Valladolid ug tindera sa Ann Cellshop nga nahimutang sa Carcar City Public Market sa Poblacion Carcar.

Matud ni PO2 Rosendo Benondo, desk officer sa Carcar City Police dihang nahinabi sa Banat News nagkanayon nga padulong na untang mag-remit sa ilang halin ug mga cellphone units ang biktima uban sa laing kaubang tindera diha sa balay sa ilang agalon dihang gibabagan sa mga tulisan.

Pag-abot nila sa atubangan sa pinuy-anan sa ilang amo kalit silang gibabagan sa duha ka lalaking nagmotor ug ang angkas diretsong mition sa biktima og armas ug mideklarar og hold up dayun gilabni ang bag.

Ang mga tulisan miikyas padulong sa barangay Perelos dala ang siyam ka mga brand new cellphones ug P1,500.00 nga cash sa biktima ug tulo ka electronic load sa Globe, Sun ug Smart.

Swerte kay ang mas dakong halin nila sa tibuok adlaw didto ra sa bag nga gidala sa iyang kauban kinsa dali kaayong nakaitsa niini sa gi-parking nga sakyanan dihang mideklarar og tulis. (BANATNEWS)