CEBU, Philippines - Gibutyag sa tigpamaba sa buhatan ni Mandaue City Mayor Jonas Cortes nga si Roger Paler nga ang napalit sa kagamhanan sa siyudad sa Mandaue nga upat ka mga Electric Jeep ( Ejeep) anaa na sa motor pool sa city hall human kini mapalit duha na ka bulan ang nakalabay.
Apan gipasabot ni Paler nga ang tag-P600 mil nga Ejeep nga gikan sa China gilukatan pa og rehistro, conduction permit ug uban pa.
Matud pa ni Paler nga sigun sa nasabutan, ang upat ka mga Ejeep, nga labing unang padaganon dinhi sa lalawigan sa Sugbo, pormal nga gamiton alang sa pagpasakay sa mga pasahero inigkahuman sa bag-ong merkado sa siyudad karong Disyembre 18, 2011.
Ang maong proyekto sa mayor nahitukma sa tinguha sa administrasyon ni Presidente Aquino nga mopatuman sa mga environmentally friendly nga matang sa transportasyon, ilabina nga pasakyan kini sa mga pasahero nga libre.
Gitumbok ni Paler nga mahimong makakarga og igong gidaghanon sa mga pasahero sa upat ka mga Ejeep sanglit dili man moabot sa 10 minutos ang biyahe niini gikan sa city health office paingon sa bag-ong merkado.
Gisalikway niini ang pagtuo nga kompetensiya kini sa mga tricycle kay may lain mang rota ang Ejeep. (BANATNEWS)