DTI naniid sa mga baligyang dayandayan sa Pasko

CEBU, Philippines - Niining nagsingabot nga pagsaulog sa Pasko ug Bag-ong Tuig ang Department of Trade and Industry (DTI) higpit nga nag-monitor kabahin sa mga Christmas lights ug uban pang Christmas accessories nga mga sub-standards.

Kahinumduman nga dunay mga nahitabong insidente sa sunog sa milabay’ng mga tuig diin ang hinungdan niini ang mga dili maayong quality nga Christmas lights.

Si Asteria Caberte, regional director sa DTI-7 sa pakighinabi niini sa Banat News kagahapon nagkanayon nga matag tuig higpit gyud ang ilang pag-monitor sa mga Christmas lights ug ubang mga Christmas accessories diha sa mga tindahan.

Matud niya nga angayang tan-awon sa publiko ang manufactured date sa mga Christmas lights ug accessories. Ug kung makita nilang 2008 ang manufactured date niini o petsa sa paggama buot pasabot expired na kini ug dili na maayong gamiton ug angayan na kining i-face-out o dili na ibaligya.

Ang mga nahisgutang produkto alang sa dayan-dayan sa Pasko gipaubos usab kini sa mandatory standard diin angayang tan-awon usab sa mamalitay ang marking “PS” o “Philippines Standard”, diin buot pasabot niini nakapasar kini sa standards sa Pilipinas.

Gawas sa PS angayang tan-awon usab sa mamalitay ang markang “ICC” o “Import Commodity Clearance” sa mga produktong imported aron masigurado ang kalidad sa ilang napalit.

Matud ni Caberte nga wala pay nadawat nga report ang iyang buhatan kabahin sa mga nakompiska sa mga expired nga dayan-dayan sa Pasko ug uban pang nakalapas sa balaod. (BANATNEWS)