Nang-hostage sa anak gikasuhan na

CEBU, Philippines - Gipasakaan na og kasong illegal possession of firearms and ammunitions ngadto sa provincial prosecutors office ang gwardya nga miunay og hostage sa iyang 15-anyos nga anak babaye didto sa Borbon.

Si Sr. Supt. Patrocinio Comendador, hepe sa kapulisan sa probinsya sa Sugbu sa pakighinabi kaniya sa mga tigbalita kagahapon nagkanayon gitun-an na nila ang pagpasaka og dugang duha ka mga kaso nga kalapasan sa R.A 9262 kon Violence Against Women’s and Children ug R.A 7610 kon Child Abuse batok sa maong suspek.

Ang suspek miunay og hostage sa iyang 15-anyos nga anak babaye sulod sa 16 ka oras gikan niadtong Miyerkules sa alas-4 sa hapon ug gibuhian niini pagka Huwebes sa alas 7 sa buntag.

Ang 15-anyos mitug-an sa Banat News nga gibaatan ang iyang walang bukton og straw ug ang pikas tumoy gihigot sa tuong bukton sa suspek hangtud nga milampos ang negosasyon inabagan sa ilang inahan ug sa konsehal sa lungsod.

Tungod sa pangabubho sa suspek ngadto sa iyang asawang si Jennifer maong gisukod sa asawa ug wala na nila tagda ang suspek dul-an na sa usa ka tuig.

Ang suspek buot untang maghikog tungod sa maong suliran maayo nalang nga nakombinsir kini.

Matud ni Comendador sa nahitabo niadtong Miyerkules kapunitan og moral lesson sa ubang pamilya nga kinahanglang palig-unon ang mga relasyon sa matag miyembro. Samtang giawhag ni Comendador ang media nga mag-amping sa pagbalita sa mga susamang mga matang sa panghitabo aron dili kopyahon sa ubang tawo. (Rey B. Pasaporte/EIM)

15-anyos naunay sa armas sa papa

Usa ka 15-anyos nga dalagita ang naangol human aksidenteng nabuthan sa armas sa iyang amahang barangay tanod samtang kini nahinanok sa pagkatulog sa ilang pinuy-anan diha sa Lower San Roque barangay Liboron siyudad sa Carcar niadtong Huwebes sa alas 5:30 sa sayong buntag.

Ang 15-anyos nga biktima ug tinun-an sa high school ug molupyo sa maong lugar naigo sa iyang walang bagtak sa armas sa amahang si Rogelio Amistad, 47, tanod sa maong lugar.

Matud ni PO2 Rosendo Benondo, desk officer sa Carcar City Police dihang nahinabi sa Banat News   nga natulog ang biktima dihang miabot ang amahan gikan nag- duty.

Giingong gibutang sa amahan ang armas niini nga kalibre .38 ibabaw sa ilang cabinet apan wala damha nga natagak kini ug mibuto.

Diha nalang miagulo ang biktima ug sa ilang pagsusi naigo ang walang bagtak niini hinungdan nga gidali pagdala sa amahan ngadto sa Carcar City District Hospital. Pagkahuman niini boluntaryong mitahan sa iyang kaugalingon sa kapulisan . (BANATNEWS)