15 mil gipaabot motambong sa National Hog Convention

CEBU, Philippines - Gipaabot nga 15 mil ka mga partisipante dinhi sa Visayas ug Mindanao ang motambong sa ika-23 National Hog Convention nga dinhi ipahigayon sa Sugbu karong bulan sa Abril sa sunod tuig.

Kini maoy gipaabot sa presidente sa Central Visayas Pork Producers Cooperative (CVIPPCO) nga si Roland Tambago.

Matud pa ni Tambago sa Banat News nga gawas sa convention adunay exhibits sa nagkadaiyang produkto sa mga namuhi og baboy sa maong mga adlaw nga ipahigayon sa Abril 19 ngadto na sa 21 sa 2012.

Sumala pa ni Tambago nga hisgutan sa maong tigom ang nagkadaiyang mga plano sa mga namuhi og baboy aron mapalambo pa ang ilang negosyo ingon man pagsigurong paigo ang ilang masuplay nga karne sa kamerkaduhan.

“Priority gyud ani ang role sa pig producers sa food security ug improvement sa farmers production efficiency,” sumala pang Tambago.

Sa pagkakaron, ang CVIPPCO maoy naglangkob sa 35 porsiyento sa nagsuplay og karne sa kamerkaduhan dinhi sa Visayas samtang 65 porsiyento mga backyard farmers nga wala masakop og kooperatiba.

Atol sa labing unang anibersaryo sa CVIPPCO niadtong milabay’ng bulan, si Agham Partylist Rep. Angel Palmones mibutyag nga hasta ang mga namuhi og baboy sa Mindanao posibleng motambong sa maong convention.

Giawhag ni Palmones ang kooperatiba nga agnihon ang mga gagmay’ng namuhi og baboy aron mas modaghan ang ilang ginsakupan ug mas aduna sila’y tingog unya didto sa gobiyerno ug kini makatabang sa ilang paglambo. (BANATNEWS)