Buhatan sa mayor ipaapil sa TV program

CEBU, Philippines -  Gusto ni Mayor Michael Rama nga ipaapil ang mga panghitabo sa executive department sa TV program sa kagamhanan sa siyudad sa Sugbo sa CCTN-47.

Nasayran nga ang ulohan sa programa sa maong estasyon gitawag og “City Council Reports” diin makita ang mga gipangbuhat sa mga konsehal sa siyudad.

Sumala pa sa mayor nga gusto niya nga butangan usab og mga report sa kalihukan sa executive department sanglit usa raman ang kagamhanan sa siyudad.   

Giklaro hinuon sa mayor nga walay malisya ang iyang sugyot sanglit ang tumong niya mao nga mahibalo ang katawhan sa mga nagkadaiyang kalihukan sa siyudad sa Sugbo, ma-legislative man o executive.

Samtang segment producer sa maong programa nga si Chris Ligan miasoy nga nag-agad ra sila sa mahimong sabot-sabot unya sa mga kadagkoan sa siyudad ug huwaton nila kung dunay mahimong bag-ong kontrata kalabot sa format sa programa.

Si Konsehal Alvin Dizon miingon nga bukas siya sa sugyot sa mayor ug magpadala lang kini og pormal nga suwat ngadto sa City Council.

 Kung mahitabo na ang sugyot ni Rama, ang modala sa maong segment mao ang buhatan ni Public Information Officer Carlo Duga-duga.

Nasayran nga ang City Council Report makita matag gabii sa CCTN-47 gikan sa Lunes hangtud sa Biyernes.

Sumala pa ni Rama nga importanteng masayod ang katawhan sa kalihukan sa siyudad, gani gipadayon gihapon niya ang newsletter nga Bayanihan Advocates Rallying for Unity and Good Governance (Barugg). (BANATNEWS)