Walo ka balay sa Tejero nasunog

CEBU, Philippines - Lima ka balay ang hingpit nga naugdaw ug tulo ang partially damage atol sa sunog nga miigo kagahapon sa udto diha sa kilid sa sitio Back Blessed Sacrament Parich Church sa barangay Tejero siyudad sa Sugbu.

Kini maoy ikatulong higayon nga ang maong barangay naigo sa sunog karung tuiga.

Si SFO2 Rogelio Valencia, imbestigador sa Cebu City Fire Department nga nahinabi sa Banat News nagkanayon ang alarma sa sunog nagsugod alas 12:56 sa Cantillas Compound.

Matud ni Valencia giingong diha sa ikaduhang andana sa balay sa magtiayong Roberto ug Lorna Lahaylahay ang sunog nga daling mikatap ug milamoy sa mga silingang balay. Subay sa listahan ni Valencia ang balay nga nasunog mao kang Diana Paracueles, Arnel Decabo, Tessie Aranguez, Elsie Cantillas ug pamilyang Logarta.

Si Sr. Supt. Aderson Comar, ang Cebu City Fire Marshall nga nahinabi sa mga tigbalita nagkanayon nga nakontrolar ang sunog mga 15-minutos nga gipaubos sa 3rd alarm diin gibana-banang mokabat og P150 mil ang danyos niini.

Matud ni Comar ila pang susihon ang hinungdan sa sunog nga naggikan sa balay sa magtiayong Lahaylahay ug usa niini mao ang electrical fault.

Si Lorna nga nahinabi sa Banat News mitug-an nga atol sa pagsugod gyud sa sunog diha siya sa gawas sa ilang balay ug nakugang nalang siyang nagsiga na ang ilang balay hinungdan nga nagdali siya og kuha sa iyang mga anak ug mga apo nga diha sa silong niadtong higayona.

Si Josephine nga anak ni Lorna miingon nga nakadungog siya og pakapaka sa taas sa ilang balay dayon misunod ang pagsilaob.

Ang kabomberohan wala hinuon makasugat og kakulian sa ilang pagresponde sa nasunogan sanglit aduna may kaagian ang mirespondeng 26 ka firetrucks.

Gipahimangnoan karon ni Comar ang publiko nunot sa nagkaduol nga Pasko nga magbantay gyud sa linya sa ilang kuryente ug dili usab magpataka og pamalit og mga Christmas lights nga substandard kay delikado kaayo sa sunog. (BANATNEWS)