Mipatay sa Maranao wa motug-an sa kauban

CEBU, Philippines - Ang suspetsadong mipusil patay sa usa ka negosyante niadtong Martes sa buntag sa barangay Tabunok nagdumili sa pagtug-an ngadto sa mga polis   sa ngalan sa duha niya ka kauban.

Si Jonabel Nacario Lopez   kinsa maoy giingong trigger man   o mipusil kang   Sony Saumay, usa ka Maranao nga tindero og mga antiyuhos ilawom sa flyover sa Tabunok, nasikop sa kapolisan sa balay sa iyang uyoan sa sitio Pang-pang, barangay San Isidro, Talisay pipila ka oras human sa hitabo.

Ang biktima naglakaw paingon sa usa ka mall alas 11:00 ang takna sa kabuntagon niadtong Martes dihang giluthang siya sa suspetsado

Si PO3 Ferdinand Pablo kinsa maoy miimbestigar sa hitabo nagkanayon nga si Lopez nagdumili sa pagtug-an ngadto kanila kabahin sa duha niini ka kauban.

Ang nahisgutang duha ka lalaki maoy giingong back-up ni Lopez dihang iyang gipusil si Saumay.

Ang motibo sa pagpamusil mao ang panimawos tungod kay sa milabay’ng tuig giingong ang manghud ni Lopez gipatay sa mga kaliwat ni Saumay.

Matud ni Pablo nga adunay misulti kanila nga nagtumbok kang Lopez nga maoy mipusil kang Saumay.

Si Lopez dali   nga nailhan tungod kay aduna kini hulagway sa gallery sa kapolisan sa Talisay.

Gibutyag ni PO3 Pablo nga si Lopez nalambigit  kaniadto sa kasong pagpamusil sa Tabunok apan ang paryente sa biktima wala na mopasaka og reklamo batok sa maong suspetsado tungod kay nahadlok.

Ang kapolisan nakadawat usab og report nga si Lopez usa ka sakop og gang apan ila pa kining sutaon, matud pa ni Pablo.

Gawas niini si Lopez makaduha na mapriso sa Talisay City Jail sa kasong robbery. Sa laing bahin, si Superintendent Eddie Recamara, hepe sa Talisay City Police Station nagkanayon nga gituohan nilang ang duha ka kauban ni Lopez nakagawas na sa Sugbo apan matud niya nga ang importante nga nasikop nila ang trigger man.

Gawas sa kasong murder, si Lopez mag-atubang usab og kasong kalapasan sa Akta Republika 9165 kon “Comprehensive Dangerous Drugs Act Law” human ma-recover sa kapolisan ang unom ka paketeng shabu sa iyang pitaka.  - BANAT NEWS