CEBU, Philippines - Ang Public Prosecutor miduso og mosyon nga nangayo og protection alang sa duha ka menor de edad nga maoy saksi sa pagdagit patay sa 6-anyos nga si Ellah Joy Pique.
Ang duha maoy mobarog isip saksi batok sa mga suspetsadong sila si Bella Ruby Santos ug sa hinigugma niining si Ian Charles Griffiths.
Sila si prosecutor Petronio Elesterio, Annabelle Robles ug Jerome Abarca miduso og mosyon nga ikatugot ang paggamit og live-link television (LLT) sulod sa usa ka lawak sa mga saksi atol unya sa ilang pagtestimoniya.
Ang maong kahimanan anaa sa Regional Trial Court (RTC) Branch 22.
Matud pa ni Elesterio nga ang maong kahimanan gikinahanglan kaayo aron maproteksyonan ang duha ka saksi nga pulos menor de edad gikan sa kalisang ilabi na kun himuon na sa mga abogado sa depensa ang way tihik-tihik nga pagsukit-sukit.
Si Ramil Alen, operator sa LLT ug usa ka staff sa Regional Trial Court (RTC) Branch 22 mibutyag nga ang maong kahimanan gikinahanglan kaayo aron dili mailhan sa mga akusado ang mga dagway sa mga saksi.
Kini tungod kay magpabilin ra sila sa usa ka lawak uban sa usa ka interpreter, social worker ug guardian atol sa ilang testimoniya.
Apan iyang giklaro nga ang guardian kinahanglang may igong gilay-on sa saksi nga sukit-sukiton aron kalikayan ang pagdiktar niini sa mga ipanubag sa pangutana ngadto sa saksi.
Midugang usab si Alen nga ang publiko makakita ra usab sa mga saksi nga motestigo pinaagi sa monitor sa telebisyon ug labaw’ng makita ang maong mga saksi sa huwes ug sa mga abogado sa panahon sa pagpanubag niini sa mga pangutana.
Samtang sa laing bahin, ang mga public prosecutor miduso usab sa ilang oposisyon sa gisang-at nga motion to allow posting bail with a prayer for marathon hearing sa mga abogado ni Santos ug Griffiths.
Dako ang ilang pagtuo nga aduna silay lig-on kaayong mga saksi nga maoy mopamatuod sa positibong hitsura sa mga akusado nga midagit ni Pique busa dili sila mosugot nga makagawas pa ang suspetsado pinaagi sa piyansa.
Midugang ang prosecution nga bisan paman kun ang resulta sa DNA ma-negatibo dili gihapon kini makapamatuod nga walay abduction nga nahitabo.
Ang public prosecutor nangita sa pagbasura sa motion to post bail nga gisang-at sa akusado apan ila usab nga gitugyan sa korte ang desisyon kalabot sa gihangyo sa akusado nga marathon hearing. - BANAT NEWS