Nangulata'g kapuyo nasakmita'g armas

CEBU, Philippines - Duha ka kaso ang giandam sa kapolisan sa Mandaue batok sa usa ka tawo nga ilang nadakpan niadtong sa minatay human kulataha niini ang iyang kapuyo ug nasakmitan pa og .45 kalibreng pistola.

Ang gidakop ug gibalhog sa bilanggoan mao si Rolito Fuentez, 29, ulitawo nga nagpuyo sa dalan Hernan Cortes sa barangay Subangdaku sa maong dakbayan.

Si SPO1 Emmanuel Inople sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku miingon nga ilang nadawat ang tawag sa telepono gikan sa usa ka babaye nga misumbong kay gikulata   siya sa suspek   sulod sa lawak sa Asiana Pension House nga nahimutang sa maog dapit.

Matud pa ni SPO1 Enople nga si SPO1 Joel Bintad ug mga kauban sa Mobile Patrol group   maoy miresponde dayon sa maong alarma   ug nailhan nila ang biktima nga mao si Palanica Cauoyan, 23 , kapuyo sa suspetsado.

Si SPO1 Inople miingon dali kaayong nasikop sa kapolisan ang suspetsado ug nasakmit usab ang gitangkil niini nga .45 kalibreng pistola nga    walay lisensya ug puno sa mga bala.

Dugang pa ni SPO1 Inople nga ang mga kasong ipasaka nila batok sa suspetsado mao ang kalapasan sa Republic Act 9262 kon violence against women ug kalapasan sa Republic Act 8294   nga may labot sa paghupot og illegal nga armas de fuego.

Nagkagulkol na karon sa prisohan ang maong suspetsado.  - BANAT NEWS