Kalag-kalag sa Talisay malinawon

CEBU, Philippines - Gumikan sa   suportang gihatag sa publiko ngadto sa kapolisan malinawon ang pagsaulog sa Kalag-kalag matud sa hepe sa kapolisan sa dakbayan sa Talisay nga si Superintendent Eddie Recamara.

Si Recamara nga nahinabi sa Banat News kagahapon nagkanayon nga usa sa natabang sa katawhan sa kamalinawon sa Kalag-kalag mao ang ilang pagtuman sa balaod .

Gawas niini ang mga tanod ug mga miyembro sa Talisay City Intelligence Bureau (TCIB) gipasalamatan sa hepe tungod sa tabang   niini sa kapolisan   sa pagmentenar sa kahapsay ug kalinaw sa tibuok dakbayan sa Talisay.

Hinuon sa menteryohan sa barangay Poblacion dunay pipila ka mga tawo   nga naimbargohan og mga ilimnong makahubog   dihang misulod kini sa maong sam-ang .

May pipila usab nga nasakmitan og   kutsilyo ug sundang ug may sound system   pa usab ang naimbargo tungod kay nakahatag kini og kasaba.

Apan matud ni Recamara   nga sa ubang mga sementeryo sa siyudad wala silay nabantayan nga nagpabadlong.

Ang mga police assistance center nga nahimutang duol sa pultahan sa sementeryo wala usay nadawat nga mga reklamo kabahin sa pagpanguot ug pagpangawat.

Kagahapon sa mga pampublikong sementeryo sa Poblacion ug Cansojong nag-huot pa kini sa mga tawo.

Ang mga tawo misugod og huot sa maong mga menteryohan niadtong Nobiyembre 1 na sa gabii.

Si Recamara midugang nga karong kadlawon (Nobiyembre 3, 2011) mo- pull-out na ang mga polis gikan sa mga sementeryo.  - BANAT NEWS