Nob.Uno malinawon - PRO-7

CEBU, Philippines - Gihulagway sa pangulo sa kapulisan sa Central Visayas nga si Chief Supt. Marcelo Garbo nga malinawon sa kinatibuk-an ang unang adlaw nga pagtimaan sa Adlaw sa mga Santos kagahapong adlawa.

Walay mga dagkong panghitabo sulod sa mga sam-ang nga gitubag ang kapulisan nga nagbantay dinhi sa Central Visayas ilabina dinhi sa Sugbu   matud pang Garbo.

Si Garbo uban kang Chief Supt. Jaime Calungsod ang pangulo sa Directorate for Integrated Police Operations (DIPO) ug ubang opisyal sa Police Regional Office-7 lakip kang Sr. Supt. Melvin Ramon Buenafe, hepe sa CCPO mibisita sa mga dagkong sam-ang dinhi sa dakbayan.

Unang gibisita sa maong mga opisyal mao ang Calamba Cemetery, dayon ang Carreta ug katapusan mao ang Queen City Memorial Garden .

Matud ni Garbo wala pay kausaban sa ilang preparasyon sa pagbantay sa mga sam-ang human sa malinawon sa unang adlaw sa pagtimaan sa Adlaw sa mga Santos ug karung adlaw kun Adlaw sa mga Patay.

Apan bisan paman daan na kaniadto pa ang pagdili pagdala og mga mahait nga butang sa mga sam-ang daghan gihapong nanuaw nga wala motahod niini.

Ang mga polis sa nagkadaiyang sam-ang sa dakbayan miembargo sa tuba, beer, gasolina nga gisulod og mineral water, mga guna, mga screw drivers, mga kutsara, mga martilyo ug uban pang gikunsiderar nila nga hait nga butang.

Samtang si Supt. Rex Derilo, hepe sa Firearms Explosives Agencies Guards and Supervision Section (Fisagss) Central Visayas nagkanayon nga wala nila gikanselar ang mga permit to carry firearms outside residence (PTCFOR) ngadto sa mga gun holders atol sa Kalag-Kalag. Apan ilang gipahimangnuan ang mga gun holders nga likayan nga pagdala sa ilang armas kay basin unya ug dili kalikayan nga mapakita nila sa mga tawo ug posibleng makamugna og kahadlok sa mga tawo.

Hangyo ni Derilo ngadto sa mga gun holders nga mo-coordinate lang sa kapulisan kun ugaling magdala sa ilang lisensyadong armas. (BANAT NEWS)