Rama nakadayeg sa preparasyon sa Kalag-kalag

CEBU, Philippines -  Gisuroy na ni Mayor Michael Rama ang pipila ka mga pampublikong sam-ang sa siyudad sa Sugbo kagahapon ug nakadayeg kini sa gihimong pagpangandam sa nagkadaiyang sektor ilabi na sa seguridad alang sa kahusay ug kalinaw karong adlawa sa pagsaulog sa Todos Los Santos hangtud na ugma sa Adlaw sa mga Kalag.

Sumala pa sa mayor nga hapsay ang programa niya nga Oplan Kalag-Kalag nga gidumala usab sa Cebu City Police Office nga dili lang mga sam-ang ang gibantayan lakip na niini ang mga terminal, pantalan ug sa mga nag-unang kadalanan sa Siyudad.

Nalipay usab ang mayor sa kooperasyon sa mga barangay nga mipadala og mga tanod aron motabang.

Nanawagan si Rama sa publiko nga sa pagduaw nila sa ilang mga minahal sa kinabuhi sa mga sam-ang kinahanglan mosubay sila sa mga pahimangno.

Lakip sa giawhag sa mayor mao ang saktong pagbahig ug paglabay sa mga basura sulod sa mga sam-ang.

Nagsugod na usab sa ilang operasyon sukad pa sa miaging adlaw ang mga sakop sa City Traffic Operations Management aron sa pagpahapsay sa dagan sa trapiko duol sa mga sam-ang. (BANATNEWS)